نرمه واران

شعر کردی کلهری (کرماشانی )‌ و مطالبی در باره ادبیات کردی


کیوزه‌ێ که و

کیوزه‌ێ که و / جلیل آهنگرنژاد

جه‌لیل ئاهنگه‌ر نێژاد (جلیل آهنگرنژاد )

ئه‌گه‌ر شکیا کیوزه ێ که‌وێ ،

ئه‌گه‌ر دڵد ته‌نگ بیو  شه‌وێ ،

سه‌رێ بکیشه ئاسمان

وه به‌رزیه‌یل که‌شکه‌شان

هساره‌ێ وه ته‌نیا دیونی

خه‌نه‌ێ وه ریو دنیا دیونی

دیونی « هشار هشاره» سه

دنیا وه‌فر  و  په‌ژاره سه

ئه‌ما یه‌کێ ئاساره سه

راێ ئێ شه‌وه‌یله چاره سه

***

ئه‌گه‌ر شکیا کیوزه‌ێ که‌وێ ،

ئه‌گه‌ر دڵد ته‌نگ بیو  شه‌وێ ،

ئیوشم  به‌و‌ره‌و واران وه کووڵ !

ئاگر مه‌رام گیان وه کووڵ !

 شه‌و ها شان شیوه‌ن که‌ره‌و

خوه‌ر ها شان ئاگر به‌ره‌و

ئاگر به‌ره یل ! ئاگر به‌ره‌یل !

ئاگر به‌ره‌یل پای دجه‌یل !

ئه‌ر ئاشق سوو بیون بچن

تا بال بیستیون بچن

دڵ به‌ن  و‌ه گیس دووسه‌وه

یا تاف ئوقیانووسه‌وه

دنیا له نوو ئاوا بکه‌ن !

ده‌روه‌چه‌گه‌ێ «سوو» وا بکه‌ن!

***

ئه‌گه‌ر شکیا کیوزه‌ێ که‌وێ ،

ئه‌گه‌ر دڵد ته‌نگ بیو  شه‌وێ ،

چه‌و گل ده ‌وه‌ێ  بان زه‌یوا

منا ، خوه‌دا ، ئه‌یوا ، یه‌یوا

له شار که‌س مه‌زانه‌گان

سه‌ر  بنه  قه‌ێ درانه‌گان

ئیوشن یه‌کێ واران وه شان

پر له عه‌تر ره‌ێحان و گیان

مانای خه‌وِ مه‌ردم زانێ

فه‌راشه‌ێ‌ها له گیرفانێ

درانه‌گان  هه‌م وا که‌ێدن

خه‌م له‌ێ هووزه ئاوا که‌ێدن

***

ئه‌گه‌ر شکیا کیوزه‌ێ که‌وێ ،

ئه‌گه‌ر دڵد ته‌نگ بیو  شه‌وێ ،

دیونی بیوچگ بیوچگ بیوچگ

هانه سه‌ر سه‌ف  مه‌لیوچگ

تا «سوو» له ئێره  خوه‌ر بیه‌ێ

له رووژ  نوو خه‌وه ر  بیه‌ێ

یه‌ێ ده‌ف وه ره و واران بچن

یه‌ێ ده‌ف وه‌ره‌و داران بچن

یه‌ێ ده‌ف وه‌ره‌و که‌و ئا‌وه‌گان 

یه‌ێ ده‌ف وه‌ره‌و رێژاوه‌گان

***

ئه‌گه‌ر شکیا کیوزهێ که‌وێ ،

ئه‌گه‌ر دڵد ته‌نگ بیو  شه‌وێ ،

وه پا ،وه ده‌س ، وه گیان بچوو

تا مال وه فره‌گان بچوو

تا سه‌رده وا جاگان بچوو

تا تاف ده‌ریاگان بچوو

ئه‌ر  که‌فته هیورد یه‌ێ چه‌وێ  

به‌ش کرد له گیانه گه‌د ته‌وێ ،

چیو شیته لێوه‌گان له‌یل ،

جوور مه‌لیوچگه‌یل وه‌یل،

هایده سه‌ر سیم سیه‌ێگ،

مه‌جلس ته‌رحیم سیه‌ێگ،

بیوشه دڵد  له‌ێوا  نیه

خوه‌ر له‌ی  که‌له  ئاوا نیه

ها ها کوره  مه‌جنوون له‌یل !

پر بوو  له تاف ئه‌لوه‌نه‌یل

تا گه‌ر شه‌وێ ئاوا بکه‌ی

 له‌ێره  منه‌ی سووما بکه‌ی

خوه‌ر  له‌ی  که‌له‌یله  جا بکه‌ی

له زڵم شه‌و حاشا بکه‌ی 

 

 کرماشان- وه هار 



نویسنده : جلیل آهنگرنژاد ; ساعت ۱٠:٠۸ ‎ب.ظ روز ۱۳٩۱/٩/٢۸