نرمه واران

شعر کردی کلهری (کرماشانی )‌ و مطالبی در باره ادبیات کردی


 
واران واران ! وه‌ره‌و کوو؟
ئاوه یل
جامه‌ک ڕچین ڕیواره‌یل خوه‌رئاوان
زه‌ۊ دی منه‌ی چه‌و ت نیه‌که‌ێ
داخ چه‌رمیه‌ری ڕێ پایزه‌یل وه‌یله
هنای ت له هه‌له‌ت کتاوه‌یل تیه‌ل
مه‌ی وا که‌ی !
کۊه‌یل چه‌په‌ڵ
سڕسڕه‌کانی که‌ن و
دار له دریژاێ درانه‌ێ دیزه‌ێ درو
وه ئه‌فتاوه مسییگه‌و منه‌ی مه‌ێانێگ
له خیاوانه‌یل پاسرکیای سوو ....
تیخ تیه‌ڵ وه ڕزاره‌و
هاوار ئه‌لوژنێد و
ماشین
دیودێ ده‌ێده خوه‌رد مه‌لیوچگه‌یل وه‌یل و
هناس سیه
دیواره‌یل گیژ داگرتیه و
هۊچ ئاخیگ
تام ترت «چگوارا» نیه‌ێ
وه‌یلیه‌یل ئایه‌م و ئایه‌مه‌یل وه‌یل!
وه‌یلیه‌یل ئایه‌م و ئایه‌مه‌یل وه‌یل!
***
{کوڕه‌گه! ئه‌و ده‌روه‌چه واز که
وای باڵ مه‌لیوچگێگ بیلا باێده ناو }
م هه‌ر سوو
له درانه‌ێگ هه‌ڵکنیه م
له دارێگ هه‌ڵبریه‌م
له که‌وشێگ هڵشێویه‌م
تا گه‌ر جاده‌گان ئفریقای
هه‌ر جار ماچ ژێر پای وه‌یلیگ بکه‌ن و
ده‌سمیه‌تم بیه‌ن
تا گه‌ر له تاف خه‌ێال گیسِ بڕیاێێگ
سناو بکه‌م
***
ئێواره
له سۊک کاخ ئلیزه
دێان چه‌فتێگ خه‌و دۊنید :
«وه‌ر سوو سه‌ما گره‌کێگ
له بان لچ ئورووپاێ سوورێگ
گیژ خوه‌ێد و گیژ خوه‌ێدو گیژ خوه ێد
م گیژ ،ت گیژ ،
ویلکانه‌گان خودا گیژ
له خوه‌رئاوا مه‌له‌وه‌رێگ گیژ
له زانستگای شه‌و وه کووڵ
ئوستادێگ گیژ
له رووژنامه‌یل سه‌رد سڕ
قه‌له‌مێگ گیژ
شاێرێگ له ناو ڕیان زنیانی گیژ
{کوڕیگ ده‌روه‌چ واز نیه که ید
تاگه ر ئیمه یلیگ باێده ناو }
***
وه‌ر سوو کوروو کوروو
له سال و سن
ره‌سن به‌سن
تا گه‌ر له سجیل کوردێگ
تا تاشه‌گان دگان ته‌زن
منه‌ی «سه‌ماگره‌ک» بکه‌ن
{ت چوه له شیرنێگ زانید
که تا ئێواره
له کاباره‌یل ئاتن هه‌لپه‌رگه که‌ێد!؟}
***
واران واران ! وه‌ره‌و کوو !؟
سێف تام ته ده‌ێد
قاهره و زئوس و ئاێه‌م تام ت ده‌ن
دیوار چین
له چین چین داوانه‌گه‌د قه‌تاره داس
دنیا په‌شێو گوپێگ له داڵاهووه و
دۊه‌ته‌یل له‌یل که‌ڵهور
دی ئاو له خه‌ێاڵ
هۊچ که‌لیمه‌ێگ نیه‌ونجن
ئینترنت تام ته نیه‌ێدن و
ده‌روه‌چه‌یل
ئراێ دیوه‌ت شه‌ۊ قرمز شه‌وه‌کیانێگ
چه‌پله ریزان نیه‌که‌ن
***
له ئێواره‌یل بێ گیرفان
شه‌قارته‌ێگ بۊه هه‌فتا سه‌رباز
هه‌ر سه‌ربازێگ
بۊه هشارێگ و شارێگ گرت
م هه‌ێمان منه‌ی ماڵ دواگه‌رێگ که‌م
تاگه‌ر شه‌قارته‌ێگ بچه‌کنێد و
له شوون جنه‌یل وه‌یل
درا وه درا بچوود
شه‌قارته‌یل له تاو تیه‌ڵ تیه‌ریکی
منه‌ی قورووش رووژ که‌ن و
ت هه‌ێمان
له بان سان تیه‌ت عومر
ده‌س له قه‌و له‌ێره‌وه‌ره‌و نه‌کردیه!
واران واران !
دنیا له کیس زمسان چێه‌و
چه‌تاڵه‌یل ده‌روه‌چ کپه‌و که‌ن و
هۊچ ئافره‌تێگ
له بان تیه‌ت هۊچ که‌لیمه‌ێگ
چه‌و چه‌وه‌کی نیه‌که‌ێد !




نویسنده : جلیل آهنگرنژاد ; ساعت ٦:٥٦ ‎ب.ظ روز ۱۳٩٢/۸/٢٤